Tuesday, August 14, 2007

حاولت تحبها ؟؟

مش عارفه ليه كل ما اسال حد بتحب مصر! يقولي لا طبعا بلاش اعمم بس اغلبية الشباب اللي في سني بيكون ده ردهم انا مش هعمل نفسي عبيطه يعني واقول هما ليه بيقولوا كده طبعا الاسباب كتير وليهم حق في معظمها بس ليه احنا سايبين الحاجات الحلوه في مصر ودايما بنفكر في الوحش وحطينوا قدمنا ليه اخدنا علي ان عيونا دايما تكون عيون ذبابيه لا تري الا القبيح انا مش بقول طبعا اننا هنمثل علي نفسنا يعني ونعيش في الوهم ان كله حلو وكله تمام ,لأ طبعا بس الفكره ان من كتر ما احنا باصين علي الوحش والغلط بس فقدنا حبنا واهتممنا باي حاجه حلوه موجوده رغم ان احنا علشان نصلح اي حاجه غلط لازم نكون حابين نصلح اصلا ,حد فهمني؟؟ يعني لازم نرجع مفهوم وشعور حبنا لبلدنا حتي لو هي وحشه ومزعلانه شويه او شويات علشان احنا بنحبها عايزين نصلح اللي مزعلنا منها علشانها وعلشنا وعلي فكره لو عايزين نصلح ونغير لسه الامل كبير بس لازم نعمل بمبدأ (ابدأ بنفسك اولا )يعني ليه ما نفكرش ان مصر دي هي اللي احنا اتولدنا فيها وكبرنا فيها وفيها اهلنا وكل الناس اللي بنحبهم لا في يوم خفنا لنصحي مش لاقين بيتنا ولا اهلنا ولا حتة لقمه عيش ناكلها يعني من الاخر حاسين نوعا ما بالامان وده اللي كتير من العرب بيحسدونا عليه ليه دايما باصين للسلبيات رغم ان الايجابيات موجوده مفيش بلد في الدنيا ولا مكان علي الارض اصلا ما فيهوش الغلط والظلم والفساد امال احنا ازاي هنحس ونعرف الصح والعدل والصلاح (وبضدها تتميز الاشياء) المشكله ان اعلامنا دايما مركز علي سلبيات بلدنا بشكل جرأ العالم العربي نفسه ان برضه يظهر سلبيتنا, يعني تفتكر اي دوله من الدول العربيه دي ما فيهاش واحد حرامي ولا مرتشي ولا ظالم يعني معقول الناس كلها عايشه زي االافلام كلهم بيحبوا بعض وكويسين ومفيش حد وحش خالص حرام عليكم ده حتي الافلام ما عملتهاش!!
انا مش كاتبه الكلام ده علشان حد يقولي لا مصر وحشه وتستاهل ولا انتي مع مين بالظبط والكلام اللي اكيد هسمعه انا عايزه اي واحد يرد يحاول(معلش هتقل عليكم)انه يفكر ويحاول كده مع نفسه يطلع ايجابيات لمصر ولو حتي وحده ويقولي لو فكر يحبها هيحبها ليه ؟او هو عايز ايه يتغير علشان يحبها (مع العلم ان محدش هيغير فيها الا احنا يعني لو احنا اتغيرنا وغيرنا من حوالينا اكيد مصر هتتغير )؟او حد يقولي هو عايز يشوف مصر ازاي (بس تفكير واقعي بلاش الخيال الجامح والاحلام الورديه )يعني اي كلمه ايجابيه يمكن ترفع معنوياتنا شويه ناحيهة بلدنا الغلبانه دي اللي اهلها مش حبنها وجيرانها ظالمنها وهما عايشين في خيرها والله يا جماعه علي راي اللي قال البلد دي احسن من غيرها بس احنا اللي ما جربناش غيرها فهضمنا حقها ومين هيرجعوا غيرناااااااااااااااااااااااااااااااااااااا؟؟
!!
By DR/ Fatfota